Mar 16 | NdeIBE | STEP | Kwathi iSabatha seledlule, uMariya Magadalena, loMariya unina kaJakhobe loSalome bathenga amakha ukuze bayoqhola ngawo isidumbu sikaJesu.

Mark 16

Ukuvuka KukaJesu

1 Kwathi iSabatha seledlule, uMariya Magadalena, loMariya unina kaJakhobe loSalome bathenga amakha ukuze bayoqhola ngawo isidumbu sikaJesu. 2 Ekuseni kakhulu ngosuku lokuqala lweviki, ilanga liphuma, base besendleleni besiya ethuneni, 3 babuzana bathi, “Ngubani ozasigiqela ilitshe lisuke emlonyeni wethuna na?”

4 Kodwa bathi bayakhangela babona ilitshe, elalilikhulu kakhulu, seligiqelwe eceleni. 5 Bathi bengena ethuneni babona ijaha ligqoke isigqoko esimhlophe lihlezi ngasekunene, bethuka kakhulu.

6 Lathi, “Lingaze lethuka. Lidinga uJesu umNazarini obebethelwe. Usevukile! Kakho lapha. Bonani, nansi indawo lapho bebembeke khona. 7 Kodwa hambani liyotshela abafundi bakhe loPhethro lithi, ‘Usehamba phambi kwenu ukuya eGalile. Lizambona khonale, njengoba walitshela.’ ”

8 Abesifazana baphuma bethuthumela njalo bedidekile bebaleka ethuneni. Kabazange batsho ulutho lakubani ngokuba babesesaba. (Imibhalo ekholekayo eyekuqaleni lobunye ubufakazi bendulo kakulaye UMakho 16: 9-20)

9 UJesu esevukile ekuseni ngelanga lokuqala evikini waqala wabonakala kuMariya Magadalena yena lowo ayekhuphe kuye amadimoni ayisikhombisa. 10 Yena wahamba wayabikela labo uJesu ayephile labo ababesesililweni sakhe. 11 Bathi besizwa ukuthi uJesu uyaphila lokuthi uMariya wayembonile, kabazange bakukholwe.

12 Ngemva kwalokho uJesu wabonakala ngesinye isimo kwababili babo abafica behamba kulelolizwe emaphandleni. 13 Labo babuyela bayabikela abanye; kodwa labo kabazange babakholwe.

14 Ngemva kwalokho uJesu wabonakala kwaBalitshumi lanye besidla; wabakhuza ngokungakholwa kwabo lokuphikisa kwabo besala ukukholwa labo ababembonile ngemva kokuvuka kwakhe.

15 Wathi kubo, “Hambani emhlabeni wonke litshumayele ivangeli kukho konke okwadalwayo.

16 Loba ngubani okholwayo abhaphathizwe uzasindiswa, kodwa lowo ongakholwayo uzalahlwa. 17 Lezi zibonakaliso zizabalandela labo abakholwayo: Ngebizo lami bazakhupha amadimoni; bazakhuluma ngezindimi ezintsha;

18 bazadobha izinyoka ngezandla zabo; bazakuthi banganatha okubulalayo kungaze kwabalimaza lakancinyane; bazabeka izandla zabo phezu kwabantu abagulayo, basile.”

19 Ngemva kokuba iNkosi uJesu esekhulume labo, wathathwa wakhwela waya ezulwini wahlala ngakwesokunene sikaNkulunkulu.

20 Abafundi bahamba bayatshumayela ezindaweni zonke, iNkosi yasebenza labo yaqinisa ilizwi layo ngezibonakaliso ezazilisekela.